شكر قبل البداية: الي حسام الحملاوي-شقيق
بما إن المدونة دي اسمها ذاكرة الطبقة العاملة, يبقي إحنا محتاجين نننشط الذاكرة دي و علشان كده هانبدأ من الاول.. من الأول خالص!
الطوائف
هي أول تكوين جماعي للعمال و أصحاب الحرف و الصنايع و النواة الأولي للنقابات.
بدأت هذه الطوائف في مصر في القرن ال 17 تقريبا.
كانت عبارة عن 3 طوايف:
طايفة التجار.
طايفة الحرفيين.
طايفة ذوي الأشغال, و تضم كل الموظفين و جباة الضرائب, كل سكان المدن, عدا الأزهرية.
علشان تدخل الطايفة تعمل ايه؟
في الأول لازم تبقي "صبي" و م تفتكرش إن الدنيا كانت سهلة, علشان تبقي صبي كان فيه مراسم للدخول يجب احترامها..
قراءة الفاتحة علي يد صاحب الورشة" المعلم" قبل البدء في ممارسة مهام العمل.
علشان تترقي حضرتك و تبقي صنايعي, فيه طبعا مراسم للدخول علشان تاخد اللقب دا"صنايعي" أو "مشدود".
مراسم تنصيب الصنايعي
الوضوء.
قراءة الفاتحة.
اخذ العهد علي يد المعلم في حضور أعضاء الطايفة و شيخها –معلم المعلمين أو شيخ المعلمين.
الإجابة عن أسئلة يوجهها المعلم, صاحب الورشة, عن أسرار الصنعة.
لبس حزام قماش علي الوسط بعد أن يقوم "المعلم بوصلة مدح أمام أعضاء الطائفة و كبيرها.
- تصفية الخلافات مع الصبيان و الصنايعية الآخرين.
عقد أول عقدة في الحزام و تقسم بعدها علي الولاء لشيخ الطايفة, و تعقد عقدة ثالثة تقسم بعدها علي الولاء للمعلم, و تعقد الثالثة لتقسم بعدها علي الولاء لزملائك من أعضاء الطايفة, و تعقد الرابعة و تقسم علي الولاء لسيد العلوم الإمام علي بن أبي طالب.
بعدها يصبح من حقك التمتع بلقب" صنايعي" وبالتالي لبس الحزام علي وسطك, و هو الشيئ الممنوع علي الصبيان, و يصبح من حقك "شد"الحزام علي وسطك وهذا سر تسمية" الصنايعي" ب" المشدود
ضوابط الترقي الي رتبة"صنايعي
ممنوع منح الرتبة من أب إلي ابنه, و بالتالي إذا أراد الابن الحصول علي لقب صنايعي, أن يلجأ إلي ورشة أخري يتعلم فيها غير ورشة والد و ذلك منعا للتوريث و المحاباة- ممكن تحط علامات تعجب من عندك!
حقوق شيخ الطايفة
فرض الضرائب و توصيلها إلي إدارة الدولة.
- إغلاق الورش المخالفة.
التوصية بسجن المخالفين و منعهم من مزاولة المهنة.
إلغاء العمل بنظام الطوائف
تم إلغاء العمل بهذا النظام عقب إنشاء المحاكم الأهلية عام 1883.
ملاحظات هامة:
مصدر هذه المعلومات رسالة الدكتوراة ل رؤف عباس. و هي منشورة في كتاب حديث لهيئة قصور الثقافة بسعر 3 جنيه..فرصة تشتروه!
التبويب و العناوين و التلخيص جهد فردي.
في التدوينات القادمة سأقوم بتجهيز بعض معلومات غير واردة في الكتاب الأصلي لمزيد من التوضيح و الشرح.
قمت بعمل تقطيع للفقرات الواردة في الكتاب حتى تصبح صالحة لعنوان فقرة رئيسي.. مثلا يتحدث الدكتور عباس عن نشوء الطبقة العاملة في سياقات متعددة,فقمت بتقطيعها و اعادة دمجها مرة اخري تحت عنوان"نشاة الطبقة العاملة". نفس الامر فيما يتعلق بتاريخ الاضرابات الاولي و تفاصيل بعضها..
ع العموم هانشوف و.. يا مسهل!
